हवी एक प्रेरणा

               'भिऊ नकोस मी तुझ्या पाठीशी आहे 'असे धीराचे शब्द आपणांस एक जिद्द प्रेरणा देऊन जातात. आपल्या सोबत कोणीतरी आहे ही जाणीव अनेक संकटांवर मात करण्याचे बळ देते.
               'तू हे करू शकशील,करू शकतोस, तू करशीलच...... अशा खात्रीदायी शब्दांनी एक अनामिक इच्छाशक्ती आपल्याकडून एखादे अवघड कामही उत्तमरित्या करून घेते. फक्त गरज आहे एका सकारात्मक प्रोत्साहनाची. मनाचा मोठेपणा असणारे येता -जाता सहज प्रेरणा देतात . इतरांना मोठे करताना स्वतःही नकळत मोठे होऊन जातात.  
                याउलट जिद्दीने पुढे जाणाऱ्याला एखाद्या क्षणी नाउमेद केले तर तो घेऊ पाहात असलेली भरारी निष्प्रभ ठरते. त्याच्या पंखातील बळ एकाएकी नाहीसे होते.  तो कोसळतो मनाने व तनानेही. किती ताकद असते ना 'प्रोत्साहन'या शब्दांमध्ये?
                   माणसाची संकुचित वृत्ती असली की तो इतरांसाठी प्रेरणा देण्यापेक्षा अडचणींचा डोंगर ठरतो. अर्थात ज्याची इच्छशक्ती प्रबळ व चिवट असते, तो असा अडचणींचा डोंगर पार करून जातोच. थोडा जास्त वेळ व श्रम लागतात इतकेच. परंतु अडचणी आल्याशिवाय यशाचे मोल ठरत नाही. त्यामुळे अडचणी ह्या हव्यातच.
                  येणारे प्रत्येक संकट खूप काही शिकवून जाते. माणसे ओळखायला शिकवतो. संयम शिकवतो. नव्याने लढण्याची उर्मी देतो तसेच पुढे जाण्याची प्रेरणाही देतो.
                  हीहि वेळ निघून जाईल. जरा धीर धर. काळासारखा गुरू नाही. गरज नाही कुणा व्यक्तीच्या प्रेरणेची वा प्रोत्साहनाची. येणारी वेळच धैर्याने सामोरे जाण्याची जिद्द देणार आहे. मी लढेन, मी जिंकेन असा  स्वतःच, स्वतःला दिलेला आशावाद मला नक्कीच पुढे घेऊन जाणार आहे. माझीच मला दिलेली प्रेरणा माझ्या पंखात बळ देईल नव्याने उभारी व भरारी  घेण्याची.
        'तूच आहेस तुझ्या जीवनाचा शिल्पकार '